豆雞眼搵手指

10W2D

自從小孜既面仔開始有好轉, 好似無咁痕之後,
佢就開始玩手指.
今日小孜搵自己既手指, 用豆雞眼仔去搵AND 望,
好得意, 好可愛.

可惜而家仲係學習搵手指既階段,
同埋手指唔可以好順利放落口裡面,
可以成日會無喇喇插眼仔.

小孜, 加油搵手指呀!!

勇敢小孜睇醫生

9W6D

HACHI 塊面已經紅左一個星期，仲生左一塊塊野，
抱住佢果時，佢不停搖頭擦我件衫用黎R痕，
所以都係決定今朝去睇醫生。

9點半，我餵佢飲奶，HACHI爸爸就親身去掛號，
差不多11點幾可以見吳醫生。
醫生一見到佢，就話果D唔係奶癬，叫做乾性皮膚炎，係濕疹果一類。
面仔，下巴，耳仔都會發出黎，
同食奶無關，亦都唔關我食左乜野事，
係同HACHI本身既抵抗力，同埋乾燥既環境事。

醫生開左藥膏俾HACHI，早晚要查一次，含有小量小量既類固醇，
希望可以保濕，消炎，止痕喇。

反正睇開醫生，問下醫生手臂卡介苖既問題，
醫生一見到含膿，就話要幫HACHI放膿，如果唔係話有機會發燒。
醫生都未開始放膿，爸爸抱HACHI訓係床仔果時，
HACHI已經喊得好勁，同埋好慘，
當醫生介一小刀果時，佢喊得仲勁，
我聽到好心痛，睇都唔敢睇，我都即場喊左出黎。

我知道放膿對HACHI黎講係好事，但聽到佢咁喊，我真係好唔開心。

離開診所，HACHI就己經開始笑番，
我地慢慢行番屋企，佢都好ENJOY俾我地抱住，
返到屋企，手臂仲有血水，但係HACHI好似己經忘記左係診所發生𣇈事，
我愛既小孜，真係好勇敢，

法國醫院5日4夜生B CAMP - DAY 5

3/7

今日終於出院了,
轉個眼, 5日4夜既生女CAMP, 咁快就完結喇.

HACHI 爸原來尋日清潔屋企, 拖地洗冷氣隔塵網, 又換左空氣清新機既隔塵網,
就係為左準備小CHI 返屋企.
餵完8點果餐奶, 11點45 唔使再去, 因為姑娘會幫手餵少少俾HACHI 食,
然後就可以出院帶HACHI 走.



出院前, 黃醫生黎過一次, 佢睇過個傷口, 話OK,
所以可以順利今日出院.
之後到兒科楊醫生黎,
佢話HACHI 一切正常,
不過做聽力測試果時, 一邊耳仔PASS, 另一邊唔PASS
當然醫生話有好多唔同既可能性.
但係我聽到佢話一邊唔PASS 果時, 真係當場流晒眼淚.
我第一次覺得自己有天生既母性,
因為會擔心自己既小朋友.

聽報告果時, HACHI 爸未到醫院, 我即刻打俾HACHI 爸,
當然一邊講一邊喊, HACHI 即刻飛的黎醫院安慰我.
一個月後可以返去法國醫院再做一次,
或者可以去政府健康院做一次,
希望到時PASS 喇.

唔知係咪私家醫院擔心產婦會走數,
所以要俾完錢, 埋晒單, 先可以拎BB 走,
我去到會計部俾錢果時, 嘩, 排隊既人多到呢... 有D 誇張!!
搞惦晒所有野, 返去餵奶房接HACHI 走...



5日4夜CAMP 正式結束,
回家大作戰!!

法國醫院5日4夜生B CAMP - DAY 4

2/7

今天早上, 傷口總算沒有那麼痛,
我亦叫HACHI 爸爸唔使早上來陪我,
佢可以休息多D, 做一D 自己既野.

今日照舊, 去餵奶房餵HACHI,
我差不多每個時段都有去,
好想抱下佢, 好想餵佢食奶, 好掛住HACHI.

每次入到餵奶房, 我都見到其他既BB 大聲嚎哭,
唯獨HACHI 好乖係度等食,
嘻, 真係好喇.
抱佢埋身, 佢尚算合作,
但其實我唔係好識埋身餵, 而家又好似無乜奶,
所以佢啜左20分鐘, 其實應該乜野都吾係好食得到,
我仲俾佢啜損左「右邊」, 真係有啲痛.

係餵奶房識到另一位媽媽, 差不多每次都係我地兩個最遲走.
一來我餵得慢, 二來我想睇耐D HACHI ,
所以最遲先肯走... HEEE



因為我會係聽日出院, 所以醫院要我地去聽一個出院講座.
講座係教點同BB 沖涼, 同埋有D 咩注意事項.
嘩, 個姑娘HEA 到暈, 教點沖涼求其到暈,
我覺得去D 奶粉講座仲仔細過佢.

今日有一班學生黎探HACHI, 
好哄動, 我都好SURPRISE, 竟然有接近10個同學仔黎,
哈哈, 當然令到餵奶房既姑娘吃驚,
所以佢地5點黎睇完BB, 6點之後去餵奶果時,
D 姑娘都認得 「326A」既BB 好多人探佢.
諗起都覺得好搞笑.

夜晚本來打算早少少訓,
點知, 去到11點幾, 開始覺得好谷奶,
我問姑娘借左個泵, 諗住泵奶,
點知又無奶出.
諗住由得佢, 聽朝訓醒先算, 但係又訓唔著.
結果點幾兩點再起身, 請姑娘幫手.
當然, 姑娘只係教點用自己隻手按下通下,
唔會幫手按喇.
搞左一個鐘, 先得果幾滴, 真係好痛苦,
真係好痛苦><



我成日聽日人地話石頭胸, 谷奶, 好辛苦
原來係咁既.

除左谷奶之外, 就係隻腳腫左.
我陀HACHI 果時, 隻腳都無事,
但係生完之後就即刻腫, 真係慘.



無諗過, 原來生仔係咁慘架...><

法國醫院5日4夜生B CAMP - DAY 3

1/7

今朝我叫HACHI 爸唔好咁早過黎,
太早, 其實佢都好悶, 無野做到.

凌晨4點幾, 姑娘已經幫我拆左插係右手果條喉,
然後7點左右就拆埋尿喉,
黃醫生巡房, 話個傷口OK,
然後就幫我落左束腹帶,
跟住姑娘千叮萬囑, 今日我要落地行,
不過要有屋企人係度扶住先可以落地.

我好努力坐起身, 但原來傷口都真係好痛,
跟住我見到我右腳腫晒.
我陀BB 果時都無腳腫,
估唔到生完之後, 就係腫到似豬蹄.

尋晚ORDER 左今朝既早餐, 就係謠柱白粥,
正呀, 我覺得真係好好食... 哈哈哈.


HACHI 爸大約10點黎扶我行路,
我行得太慢, 同埋傷口好痛.
本來報左名11點去餵HACHI, 結果都取消左.

練習左一段時間, 食埋LUNCH (HACHI 麻麻煮既飯)
然後就好餵奶房餵HACHI
首先去洗手, 拎袍
然後入大房, 用棉花球加水清潔拉之,
跟住就搵番自己個BB, 等姑娘抱過黎.

第一次餵HACHI, 乜都唔識,
姑娘教點埋身咬拉之, 又教點掃風.
雖然拉之未有奶, 但係HACHI 好乖都有啜,
啜左20分鐘, 一邊啜, 一邊訓,
哈哈, 佢真係好搞笑.
然後就補奶粉,
我入院果時揀左能恩,
姑娘話俾30ml 俾飲, HACHI 係咁啜啜啜啜, 其實好快就搞惦左30ml
之後就學掃風, 一拍, 佢就醒左, HAHA, 真係好鬼可愛.
全場得我一個, 一邊餵一邊同HACHI 講野.
我攬住HACHI, 感覺好幸福呢.

如是這, 我就決定一日去五次,
一來想餵HACHI, 二來想抱住佢見下佢,
就算傷口痛, 都值得既.

由於今日係七一, 係公眾假期, 所以有兩批朋友黎探我. 

私家醫院有個好既地方, 就係探病時間好長, 同埋無限人數. 

所以HACHI 爸可以成日都陪到我, 朋友又可以隨時黎睇到我. 

同樣因為咁, 有個唔好既地方, 就係如果間房太多人, 就會好似開PARTY 咁. 

幸好, 我間房連埋我只係得兩個產婦, 所以都未算開PARTY

到左DINNER, 都唔知食乜野好, 

HACHI 爸幫我去左CANTEEN 買DINNER 俾我食, 

然後我7點去餵HACHI, 8點就報名去親子時間, 一齊睇HACHI

第一次, 我地兩個一齊去睇HACHI, 

見到HACHI, 我地個感覺都覺得好奇妙. 

起初, HACHI 係我肚內碌黎碌去, 爸爸會成日都摸佢同佢講野, 

而家到佢出左黎, 我地兩個一齊摸住佢個頭仔同佢傾計, 

真係一件好開心, 好感動既事. 

15分鐘好快就過去, 

HACHI 爸話, 聽日唔去親子時間, 

等HACHI 返屋企, 我地日日都有親子時間. 

(話雖如此, 其實我覺得佢好想好想好想去抱住HACHI 既)

夜晚11點去餵小CHI, 明顯地餵夜奶既媽媽少左,

唔緊要, 我去同小CHI 講句早抖, 我會訓得開心D.  

法國醫院5日4夜生B CAMP - DAY 2

38W4D

30/6

尋晚成晚都訓唔到,
腦海內太多野要諗, 有時又諗起HACHI, 有時又諗起老公,
有時又諗起今朝個手術, 由2點幾到6點幾都訓唔到,
期間上FACEBOOK 同埋INSTAGRAM
見到依班好有心既年輕人,
佢地每人送一個心俾我.
我唔知邊個發起,
亦唔知點解佢地會記得我係6月30日生BB,
謝謝佢地...
我同佢地相識左至少三年, 甚至有D 識左6年,
我見到佢地既心意, 真係好感動...

 

眼光光, 到六點幾, 姑娘入黎量血壓
然後就差不多要準備去開刀.

首先要除晒所有衫, 換手術袍, 然後係床上等姑娘推入手術室.
由於我係7點半開刀, 所以7點之前已經要準備好所有既野.
因為未到探病時間, 所以我見到HACHI 爸,
我不停問姑娘, HACHI 爸係邊, 佢地安慰我, 話我老公係大堂等緊.

由產後病房推去手術室, 途中見到HACHI 爸,
HACHI 爸陪我到手法室門口,
其實我好驚, 我驚到個人不停咁震.
點解咁驚?
可能我怕開刀卦, 我怕有意外!

係手術室, 姑娘同我對左少少資料, 然後等左一陣,
就推左入一間房.
房內有麻醉科郭醫生.
首先係右手插喉, (嘩, 都真係有D 痛)
然後就係背脊打麻醉針.
我覺得最得人驚係依一PART,
因為根本睇唔到, 唔知道佢幾時打針.
加上黃醫生又未入到黎, 佢地要等埋黃醫生先打針,
係等待果一段時間, 我成個人都震晒.
加上HACHI 爸又未入得黎, 我就係度乾等.

終於到打麻醉針, 打完之後, 本來無乜特別既感覺,
但係突然間雙腳好脾,
係依個時候, 又話要插尿喉, 我又好驚,
驚仲未麻醉到, 會痛, 所以我不停地郁, 但係又郁唔到.
最後, 原來唔痛地插到尿喉 (仲要俾醫生笑)
係依個時候, HACHI 爸終於可以入黎陪我,
我成個人都定晒...

我問黃醫生, 要等幾耐會見到HACHI
佢答我「由而家開始計, 3分鐘」
嘩, 我估都估唔到, 原來有咁快.

果然3分鐘都唔使, 郭醫生係我肚頂度推左一下,
HACHI 就不停咁大喊.
黃醫生話, HACHI 都未離開我個肚, 就已經係咁喊喇...
嘻嘻....
然後醫生抱HACHI 埋黎俾我地睇, 同埋幫我地影相.
HACHI 好似爸爸,
本來不停喊, 但係影相果時就收晒聲
醫生將佢放係我頭隔離, 原來HACHI 係咁細粒.

有好多人話, BB 出世果刻好感動, 好想喊

但係我反而無, 

我見到HACHI 果刻, 好開心, 好開心, 

我同HACHI 爸爸講, 「我地隻HACHI 出左黎喇」

我不停地笑, 我覺得自己比想像中更開心同埋興奮. 

影完相之後, HACHI 爸爸陪我多一陣就要出去, 

整個手術大約前後45分鐘就完成. 

然後我就被推番上去病房. 

可能尋晚無訓既關係, 我開始眼訓, 

訓左一陣, 見到HACHI 爸係我隔離, 我好感動. 

HACHI 爸爸都好倦, 所以我同佢講, 不如佢返屋企抖下, 然後夜少少先再黎

之後全日我就半睡半醒. 

期間, 有兩批同事黎探我, 

爸爸媽媽阿哥阿嫂又有黎探我, 

佢地個個都可以見到HACHI, 

但係我仲未落得床, 所以仲未見得小痴. 

手術後, 醫生話要等一日, 同埋等放左屁, 先可以食固體既食物, 

所以夜晚我只能夠食粥水, 

其實我都唔算肚餓, 所以食粥水都OK, 

只係我飲水太少, 所以排尿太黃, 俾姑娘叮囑我要食多D 水. 

夜晚八點左右, 本來HACHI 爸爸會去親子時間, 

但係姑娘話, 親子時間, 係要父母同去, 

所以.... HACHI 爸爸失望而回

其實我都好想見HACHI, 不過我等, 希望可以聽日去餵奶果時見到小痴. 

正當我地兩個吹緊水果時, 

突然有姑娘推HACHI 入病房. 

唔知係咪知道我手術後落唔到床, 

又未見過小痴, 

所以專登推入黎俾我地睇. 

見到小痴, 眼仔碌碌, 我都好開心... 

好彩HACHI 爸未走, 如果唔係佢會MISS 左依個MOMENT

晚上10點, HACHI 爸要走, 我就好好係醫院再訓一晚.

法國醫院5日4夜生B CAMP - DAY 1

38W3D

等了38WEEKS, HACHI 終於要出世.

29/6
本來諗住夜晚食餐好既, 因為開完刀會食唔到野,
同埋坐月會無啖好食, 所以諗住搵好野食.
點知, HACHI 爸爸話唔肚餓,
我突然間好想食麥記,
所以就去左食雙層芝士漢堡餐喇.

HAHA, 生女之前去食麥記, 真係搞笑.

夜晚8點幾, 坐的士去到法國醫院,  上3樓辦入院手續,
估唔到原來有好多FORM 要填,
本來諗住係我填FORM (HACHI 爸爸最唔鍾意填FORM)
點知姑娘話, 俾爸爸做, 因為媽媽仲多野要搞.

我幫HACHI 決定左係法國醫院做「聽力測試」同埋「新生嬰兒代謝篩查」,
前者俾$800左右, 後者就俾$1XXX,
其實本來健康院都有得做,
不過唔想出世之後, 成日拎HACHI 去健康院咁多次,
所以都係決定係醫院做.

之前都聽聞過有「親子時間」,
即係有15分鐘, 俾爸爸媽媽去一間房同BB 相處一下
對於我黎講, 其實唔係意義重大, 因為我相信我餵奶都見到佢 ,
但係對HACHI 爸黎講, 就好大意義,
因為HACHI 爸係依5日4日係無得惦HACHI 的,
所以, 係要俾$60, 但係都照俾.

至於醫院, 係有固定既餵奶時間, 大約每4個鐘一次,
亦有唔同既TIMESLOT 探BB,
姑娘話, 最好GROUP 埋一堆人一齊睇,
無謂BB 要推出推入幾次.

我一直都想人講可以REQUEST 訓窗口位既床, 

但係原來係要每日俾多$50, 

私家醫院真係樣樣計到足, 

不過HACHI 爸話, 照俾, 因為佢覺得我訓窗口位既床會開心D , 

的確又係既, 所以我就揀左窗口位. 

所有文件搞惦晒, 就俾姑娘帶左入房仔, 

要量血壓, 聽HACHI 心跳, 同埋要悌毛毛, 

俾埋訂金, 就正式上房, 326A

起初我仲以為好正, 因為成間房都無人, 我以為可以住到私家房, 

但過左10分鐘之後, 就有另一位媽媽入左黎, 

唔緊要, 就算訓滿3個人, 都無咩所謂, 

其實都唔算太嘈.

其實法國醫院包既基本野都OK, 

個人清潔用品足夠, 仲有床墊, 產婦M巾, 網褲都足夠

好彩, 無買多左無謂既野.

搞惦晒所有既野, 都已經差不多10點左右
探病時間已經過左, HACHI 爸爸要返屋企.
(出面落好大雨, 幸好住得夠近)
一個人係醫院, 我以為會訓得好, 原來都唔係,
我仲諗起上次係聯合無左細B 果時既情景,
又擔心聽日既開刀手術,
一直都訓唔到.

又期待, 同時又擔心.....